نواز شریف کرپشن پر تیار کی جانے والی جے آئی رپورٹ پر سپریم کورٹ پرسوں سماعت کرے گی

حکمران جماعت پہلے ہی اس رپورٹ کا مسترد کرتے ہوئے اسے عمران نامہ قرار دے چکی ہے جے آئی ٹی کی جانب سے سپریم کورٹ میں رپورٹ جمع ہونے کے بعد ملک میں سیاسی درجہ حرارت بھی عروج پر پہنچ چکا ہے اور تمام بڑی سیاسی جماعتوں کی جانب سے وزیراعظم نواز شریف کے استعفے کا مطالبہ بھی ذور پکڑ گیا

ہفتہ 15 جولائی 2017 20:53

اسلام آباد (اُردو پوائنٹ اخبار آن لائن۔ اتوار 16 جولائی 2017ء) وزیراعظم نواز شریف کی کرپشن پر تیار کی جانے والی جے آئی ٹی رپورٹ پر سپریم کورٹ پرسوں (پیر) سے باقاعدہ سماعت کا آغاز کرے گی،جبکہ حکمران جماعت پہلے ہی اس رپورٹ کا مسترد کرتے ہوئے اسے عمران نامہ قرار دے چکی ہے دوسری جانب جے آئی ٹی کی جانب سے سپریم کورٹ میں رپورٹ جمع ہونے کے بعد ملک میں سیاسی درجہ حرارت بھی عروج پر پہنچ چکا ہے اور تمام بڑی سیاسی جماعتوں کی جانب سے وزیراعظم نواز شریف کے استعفے کا مطالبہ بھی ذور پکڑ گیا ہے ،جبکہ وزیراعظم نواز شریف سمیت حکمران جماعت نے استفعے کے مطالبے کو مسترد کرتے ہوئے جے آئی ٹی رپورٹ کو چیلنج کرتے ہوئے سیاسی اور قانونی لڑائی لڑنے کا فیصلہ کر رکھا ہے ،تفصیلات کے مطابق پانامہ لیکس کے حتمی اور آخری رائونڈ کا آغاز کل پیر سے ہو گا ، جسٹس اعجاز افضل کی سربراہی میں جسٹس شیخ عظمت سعید اور جسٹس اعجاز الاحسن پر مشتمل تین رکنی پانامہ عملدرآمد بنچ صبح ساڑھے نو بجے کیس کی سماعت کا آغا کرے گا ، جس میں فریقین کی جانب سے جے آئی ٹی رپورٹ پر اعترضات داخل کیے جانے کا امکان ہے ، یا د رہے کہ جسٹس اعجاز افضل کی سربراہی میں پانامہ عملدرآمد بنچ پورا ہفتہ مکمل رہے گے جس سے آئندہ ہفتے کیس تسلسل کے ساتھ جاری رہنے کا بھی قوی امکان ہے ، تجزیہ کاروں کا کہنا ہے کہ پانامہ کیس کا یہ رائونڈ آخری اور حتمی ہے اور سپریم کورٹ صرف نااہلی کا فیصلہ نہیں کرے گی بلکہ وزیراعظم کیخلاف مزید تحقیقات کا دائر کار وسیع کرنے کا فیصلہ بھی دیا جا سکتا ہے ، تجزیہ کاروں کا کہنا ہے کہ اگر حکمران جماعت کی جانب سے عدالتی کارروائی میں خلل یا ججز کی تبدیلی کے لیے درخواست نہیں دی گئی تو قوی امکان ہے کہ پانامہ کا حتمی رائونڈ آئندہ ہفتے اختتام پذیر ہو جائے گا ،تاہم قانونی ماہرین کا کہنا ہے کہ سپریم کورٹ جلد بازی میں کوئی فیصلہ نہیں دے گی ، رپورٹ کا باریک بینی سے جائزہ لینے کے بعد فریقین کے اعتراضات اور پر دلائل سننے کے بعد فیصلہ ہو گا ، ماہرین کا کہنا ہے کہ سپریم کورٹ فریقین کے دلائل سننے کے بعد جے آئی ٹی رپورٹ کو مسترد یا تسلیم کرنے بارے فیصلہ دے سکتی ہے اگر سپریم کورٹ نے جے آئی ٹی رپورٹ کو تسلیم کر لیا تو پھر وزیراعظم نواز شریف کو نااہل کرنے سمیت انکے کیخلاف مقدمات چلانے کا حکم بھی دیا جا سکتا ہے ۔

بابر انور عباسی