اگر ایران جیسا مجرم ملک بھی شریف اور معزز ہے تو پھر قطر کو مبارک ہو،سعودیہ

بہت جلد آپ کو ایران کے ساتھ راہ و رسم بڑھانے پر شرمندگی اٹھانا پڑے گی،سعودی وزیرمملکت برائے خارجہ

بدھ 13 ستمبر 2017 12:05

دوحہ(اُردو پوائنٹ اخبار آن لائن۔ جمعرات 14 ستمبر 2017ء)قطر کے وزیر مملکت برائے خارجہ امور سلطان بن سعد المریخی کی جانب سے ایران کو ’شریف‘ اور معزز ملک قرار دینے پر سعودی عرب نے سخت برہمی کا اظہار کیا ہے۔عرب ٹی وی کے مطابق المریخی نے یہ بات عرب لیگ کے وزراء خارجہ اجلاس میں سعودی عرب، متحدہ عرب امارات، مصر اور بحرین کے مندوبین کو مخاطب کرتے ہوئے کی۔

گذشتہ روز عرب لیگ کے وزرائے خارجہ کے اجلاس کا مصر میں آغاز پر سکون انداز میں ہوا مگر اجلاس کے دوران قطری وزیر مملکت برائے خارجہ امور سلطان بن سعد المریخی نے بائیکاٹ کرنے والے چار عرب ممالک کو اشتعال دلانے کے لیے ایران کی حمایت کا کھل کر اظہار کیا۔قطر کے ایران کے ساتھ تعلقات کو سند جواز فراہم کرنے کے لیے المریخی نے کہا کہ ایران ایک ’معزز اور شریف ملک ہے۔

(جاری ہے)

خیال رہے کہ یہ چاروں ممالک جون سے قطر کا یہ کہہ کر بائیکاٹ جاری رکھے ہوئے ہیں کہ دوحہ دہشت گردوں کی معاونت کے ساتھ ساتھ عرب ممالک کے اندرونی امور میں مداخلت کا مرتکب ہے۔قطری وزیر مملکت کی طرف سے ایران کو معزز ملک قرار دینے پر مصر میں متعین سعودی سفیر اور عرب لیگ میں مملکت کے مستقل مندوب احمد قطان نے کہا کہ اگر ایران جیسا مجرم ملک بھی شریف اور معزز ہے تو پھر قطر کو مبارک ہو۔

انہوں نے کہا کہ آج قطر ایران کو معزز ملک قرار دیتا ہے مگر اسے بہت جلد یہ احساس ہوگا کہ تہران کے ساتھ تعلقات کا قیام بہت بڑی غلطی تھی کیونکہ ایران ہمیشہ خلیجی ملکوں کے خلاف سازشیں کرتا رہا ہے۔احمد قطان نے کہا کہ قطری مندوب کہتے ہیں کہ ایران ایک معزز ملک ہے۔ واللہ اس سے بڑا مذاق اور کوئی نہیں ہوسکتا۔ ایران نے ہمیشہ خلیجی ملکوں کے خلاف سازشیں کیں۔

ایک ایسا ملک جس کے کارندے بحرین اور کویت میں جاسوسی کرتے ہیں وہ قطر کے لیے شریف اور معزز ہوگیا۔ یہ وہی ایران ہے جس نے تہران میں سعودی سفارت خانے کو نذرآتش کیا تھا۔ مگر افسوس ہے کہ قطری وزیر مملکت ایران کو ’شریف‘ ملک قرار دیتے ہیں۔سعودی سفیر نے قطری وزیر کو مخاطب کرتے ہوئے کہا کہ ایران تمہیں مبارک ہو۔ بہت جلد آپ کو ایران کے ساتھ راہ و رسم بڑھانے پر شرمندگی اٹھانا پڑے گی۔اس موقع پر مصری وزیرخارجہ سامح شکری نے بھی قطری وزیر مملکت کے ایران کی حمایت پر مبنی بیان کی شدید مذمت کی۔ انہوں نے کہا کہ عرب لیگ کے اجلاس کے دوران تنازعات کو اچھالنے کا طرز عمل قابل قبول نہیں۔