سندھ ہائیکورٹ نے ڈاکٹر عاصم کے خلاف کرپشن ریفرنس میں شریک ملزمان کی عبوری ضمانتوں میں توسیع کردی

Mian Nadeem میاں محمد ندیم جمعرات 19 اکتوبر 2017 11:29

کراچی(اردوپوائنٹ اخبارتازہ ترین-انٹرنیشنل پریس ایجنسی۔19 اکتوبر۔2017ء) سندھ ہائیکورٹ نے سابق مشیر پیٹرولیم ڈاکٹر عاصم کے خلاف 462 ارب روپے کے کرپشن ریفرنس میں شریک ملزمان کی عبوری ضمانتوں میں توسیع کردی ہے۔ڈاکٹر عاصم کے خلاف 462 ارب روپے کی کرپشن ریفرنس میں شریک ملزمان کی ضمانتوں کی درخواست کی سندھ ہائیکورٹ میں ہوئی۔

(جاری ہے)

دوران سماعت نیب نے موقف اختیارکیا کہ ملزمان نے اپنے اختیارات کا ناجائز استعمال کیا، جس کے ٹھوس شواہد موجود ہیں۔

عدالت نے نیب کو تنبیہ کی کہ درخواستیں 2016سے زیر التوا ہیں نیب دلائل مکمل کرے۔مزید تاخیر برداشت نہیں کی جائے گی۔سندھ ہائیکورٹ نے ملزم اعجاز چودھری، اظہر حسین، صفدر حسین اور عبدالمجید کی عبوری ضمانتوں میں توسیع کرتے ہوئے نیب پراسیکیوٹر اور نیب تفتیشی افسر کو آئندہ سماعت پر حاضری یقینی بنانے کی ہدایت کردی۔