شاہد آفریدی کچرا چننے والے بے سہارا اور غریب بچوں کی آواز بن گئے

سابق کپتان کچرا اٹھانے والے بچوں کو اپنے گھر لے گئے ، جوتے پہنائے اور کھانا بھی کھلایا یہ بھی ہمارے معاشرے کا حصہ ہیں، اپنے لیے جینا تو آسان ہے چلیں دوسروں کے لیے جیتے ہیں، شاہد آفریدی کی ٹوئٹ

جمعرات 28 جون 2018 17:37

شاہد آفریدی کچرا چننے والے بے سہارا اور غریب بچوں کی آواز بن گئے

لاہور(اُردو پوائنٹ اخبارتازہ ترین - این این آئی۔ 28 جون2018ء) قومی کرکٹ ٹیم کے سابق کپتان شاہد آفریدی کچرا چننے والے بے سہارا اور غریب بچوں کی آواز بن گئے۔شاہد آفریدی بہترین کرکٹر تو ہیں ہی اس کے ساتھ ان کے دل میں غریب اور بے سہارا بچوں کے لیے بے انتہا محبت بھی ہے، جس کا مظاہرہ حال ہی میں دیکھنے میں آیا۔ شاہد آفریدی نے اپنے ٹوئٹر اکائونٹ پر ایک ویڈیو شیئر کی ہے جس میں گلی محلوں میں گھوم پھر کر کچرا چننے والے بچے نظر آرہے ہیں جن کی شاہد آفریدی نے نہ صرف مدد کی بلکہ بچوں کی مدد کے حوالے سے بہت ہی خوبصورت اور جذباتی پیغام بھی شیئر کیا ہے۔

شاہد آفریدی نے کچرا اٹھانے والے بچوں کے حوالے سے کہا کہ یہ بھی ہمارے معاشرے کا حصہ ہیں، یہ بچے ننگے پائوں تھے مجھ سے یہ دیکھا نہیں گیا میں انہیں گھر لے آیااور اپنی بیٹیوں کے جوتے جو وہ ہرسال لیتی ہیں ان بچوں کو پہننے کے لیے دئیے۔

(جاری ہے)

یہ بچے ابھی میرے ساتھ ناشتہ بھی کریں گے۔ شاہد آفریدی نے تمام لوگوں کو مخاطب کرتے ہوئے کہا کہ میرے کہنے کا مطلب یہ ہے کہ آپ لوگوں سے جتنا ہوسکے اپنے آس پاس موجود لوگوں کا خیال رکھا کریں شکریہ۔

شاہد آفریدی نے کہا کہ اپنے لیے جینا تو آسان ہے، چلیں دوسروں کے لیے جیتے ہیں۔ ہمیں قدرت کی طرف سے بیش بہا نعمتوں سے نوازا گیا ہے اور اب وقت ہے اپنے بھائیوں اور بہنوں کے لیے کھڑے ہونے کا، لہذا ان سب کا خیال رکھیں، انہیں پیار دیں۔واضح رہے کہ شاہد آفریدی کی زیر نگرانی شاہد آفریدی فانڈیشن بہت سے بچوں کی کفالت کررہا ہے۔